Къырымнынъ тарихий адларыны къайтармакъ ичюн къанун лейхасы азырланмакъта

17.06.2008 11:43

Стаття в кримсько-татарському електронному виданні Янъы Дюнья

«Народная самооборона» блокындан халкъ депутаты Олесь Доний Тузлада «Баррикада»  фестивалини кечирмек ниетинде. Бундан да гъайры халкъ депутаты Юкъары Радагъа Къырымнынъ тарихий адларынынъ къайтарылмасы боюнджа къанун лейхасыны теклиф этеджеги акъкъында айтты. Бу акъта О. Доний эдебиятшынасларнынъ «Бу Къырымнен не япмалы?» мевзусында отькерильген «тёгерек маса»сында айтты. Мунакъашалар Киев-Печерск лаврасынынъ китап ве китапларнынъ дердж этилюв музейинде Исмет Шейх-заденинъ къырымтатарларнынъ «арт-юрта» лейхасынынъ макети узеринде олып кечти. О. Донийнинъ айткъанына коре, Украина озь тарихий кечмишини къайта баштан тюшюнип чыкъмакъ керек.

- Авропа халкъларынынъ тарихына далып, Украинанынъ тарихы - бу эм Понт румларынынъ, эм къырымтатарларнынъ тарихы… Бу уфачыкъ ве аджайип тарихны насыл интеграция япмакъ биз ичюн меселедир. Чокъ языкъ ки, девлет севиесинде бу меселенен кимсе огърашмай. Шу себептен Къырымгъа четтен теджавуз этиледжек, мында токътамай давалар чыкъаджакъ, эм де олар чыкъып туралар, - деди халкъ депутаты. Меселенинъ мусбет чезильмесине О. Доний озь тарафындан язда Тузлада «Баррикада» украин-къырымтатар-рус фестивали кечирмек ниетинде.

- Бир ай эвель озь ярдымджыларыма «Широкое», «Раздольное», «Советское» ерине Къырымнынъ тарихий, къырымтатар ве рум адларынынъ къайтарылмасы акъкъында къанун лейхасыны азырламаларыны авале эттим, - деди О. Доний.

www.yanidunya.org